ينصر دينك يا بطل
قتلت ناس عُزًّل كتير
ستات، شيوخ وكمان عيال
أزحت عنا خطر كبير
دى ناس بتقول الله محبة
والمحبة دى شئ خطير
إقتل بطرس
وإقتل مينا
إللي إخواتهم
ماتوا فى سيناء
وإللى ولادهم
رقصوا فـى فرحك
وإللي فـ ميّتم
بيعزّينا
إقتل مارى
وطنط تريزا
دول ناس مافيهومشى ولا ميزة
دايمًا كده يبتسموا فى وشك
ويقولوا أهلاً
خطوة عزيزة
وإقتل برضه
عمّك حنا
في أى خناقة
بيحوش عنّّا
غاوى يصّلح
بين الناس
ولا يمكن
يوّرد على جنّة
وإقتل سامى ناجي نجيب
أصل الإسم صراحة مريب
يمكن يطلع واحد منهم
أو داقق على إيده صليب
ولا أقولك… إضرب شبرا
والكيت كات وميدان الأوبرا
فجر واحدة في كل مكان
خلّي جيرانهم يصبحوا عبر
لينا رب إسمه الكريم
ها يجي يوم تعرض عليه
تقف أمامه و يسأل الشخص ده عملك إيه؟
بأى ذنب تقتله
وفين ومين وإزاى وليه؟
إبقى قول لى يا بطل
ها ترد يومها..
وتقول إيه؟.
أحمد فؤاد نجم
