( كاهن يرتدي زي القداس ، أمامه طابور مقدم عل المناولة، الخورس يرتل ترنيمة التوزيع (إن فادينا دعانا كلنا نحيا به . الشخص الثالث في الطابور يلبس رداء ابيض وله لحية (قريب الشبه بصورة يسوع المعتادة، يسوع يصل أمام الكاهن محاولا الاشتراك في المناولة)
الكاهن: أنا مش عارفك ؟ أنا متأكد انك غريب مش من رعيتي؟ أنت مين ؟
يسوع : ينظر إلى الجمع ويقول: كل إنسان هو قريبي
الكاهن : ده مش مهم ، المهم أنت اتعمدت؟
يسوع : بالتأكيد اتعمدت !
الكاهن : ايه ماركة المعمودية بتاعتك أرثوذكسية ولا كاثوليكية ؟؟ ( بلهجة حذرة)
يسوع : لا أرثوذكسي ولا كاثوليكي؟
الكاهن : تبقى بروتستانتي !
يسوع : ولا بروتستانتي
الكاهن : أمال ملتك أيه وازاي تقول انك اتعمدت؟
يسوع : أنا إللي عمدني يهودي كان مكتوب لي كدة
الكاهن : يهودي؟!! نهارك مش فايت!!
يسوع : أيوه ، عمدني ابن خالتي وهو يهودي اسمه يوحنا
الكاهن : يا ابني ، هو كل من هب ودب يتناول من الجسد المقدس ، أنت مش عايش في الدنيا ولا ايه انت عمرك ماسمعت تعليم الكنيسة انها مش بتعترف إلا بمعموديتها وبس؟ إللي يتناول من جسد المسيح ويكون مش من كنيستنا يكون غير مستحق هيموت في الحال أو يجيله فشل كلوي، او سرطان، وربنا مش هايرحمه لانه تهاون مع جسد الرب!!
يسوع : ( المسيح يندهش) يموت إزاي، إللي بين أديك يا أبونا هو خبز الحياة أيوه الحياة!!! مش الموت وهو إحياء للروح والجسد، وانا سمعتك بتقول في القداس يعطى لغفران الخطايا.
الكاهن : الله الله ، انت جاي تعلمني ، وحياة أبوك أنا مش عاوز مواعظ، تعليمات رؤساء جماعتنا واضحة علشان تشارك في المناولة لازم نعمدك ونغطسك في الماء تلات مرات.
يسوع : تغطسوني في الميه ليه؟
الكاهن : انت فعلا صعبان عليّ ، تغطس علشان تدفن في جرن المعموديه زي المسيح ما ادفن في القبر.
يسوع : (باندهاش ورفض) ادفن تاني !! يا أبونا أنا ادفنت وقمت واسال كل قرايبي اللي هنا واللي في كل مكان
الكاهن : جاهل وقرايبك جهلة التعليم الصحيح بيقول إن دفنك باطل ولازم تدفن من جديد، وإلا لا شركة بيننا فهل معقول ان تجتمع الظلمة مع النور، أهرب من الضلمة اللي انت فيها ، وساعتها هتدخل الي شركة الكنيسة اللي ما في زيها وتكون من جماعة القديسين اللي مش زي بقية الناس بتوع العالم… وحاجات تانيه هاخلي الخدام يعلموهالك
يسوع : أزي يا أبونا عمادي باطل وابويا السماوي قبله وباركه
الكاهن : يا رب ارحمني انت هتعلمني …تطلع مين أنت علشان تعلمنا… وبعدين تعال هنا هل ادهنت 36 رشمة بالزيت المقدس
يسوع : الزيت المقدس و36 رشمة ؟؟
الكاهن : علشان تنال الروح القدس
يسوع : آه ، فهمت. بس أنا نلت الروح القدس وحل عليّ يوم معموديتي
الكاهن : من غير 36 رشمة زيت
يسوع : أيوه صدقني حل عليّ الروح القدس يوم عمادي حتى ابويا كان فرحان بي جدا وقال هو ده ابني الحبيب لما عمدني قريبي حتى ساعتها ظهر الروح على هيئة حمامة ووقفت على كتفي
الكاهن : يابني حمامة أيه وفرخة أيه أحنا في كنيسة محترمة مش في بنيّة حمام
يسوع : بس أنا حابب اشارك حبايبي الخبز الواحد
الكاهن : الموضوع مش موضوع حابب ومش حابب ، هي كل حاجة نقول محبة ، سيب المحبة دلوقتي. هناك أوامر الرؤساء وأصول الطقوس أنت عاوزني أخالف تعاليم وأوامر السلطة الكنسية!!.
يسوع : بس أنا حابب اني اشوف الخبز الواحد بيجمع كل البشرية
الكاهن : عاوز تشارك الخبز معاهم ، المخابز عندك كتير بس ابعد عننا.
الكاهن : فيه واحد عاقل وأصيل ، يسيب لبن أمّه ويروح يرضع لبن وحده اجنبية ، او يشتري لبن مستورد !!! تسيب امك الكنيسة وتروح ورا كنايس ربنا يعلم هي جايه من فين؟؟ ارجع يا ابني ربنا يهديك !! انا خايف عليك من الهلاك ، ومن تجارب الشيطان ، ارجع وتوب وخليني أعمدك من تاني، بس دي مش إعادة معمودية، لان المعموديه عندنا هي واحده والايمان واحد لكن بما ان معموديتك الاولي باطله انا هاعمدك تاني.
الكاهن : قول لي انت متزوج ؟؟
يسوع : لا
الكاهن : الحمد لله ، أصلك ولو انت متزوج تبقى عايش في حالة زنا … ما تزعلش منى لا مجاملة في الدين، كل زواج خارج كنيستنا يبقى باطل.
يسوع : يعني ايه باطل
الكاهن : يعني ما اسموش زواج … يعني بالصريح الفصيح زنا ولو عندك اولاد هم اولاد حرام لغاية ما تتعمد انت وعيلتك وتتجوز عندنا ومن لحظتها هاتتغفر لك كل الخطايه السابقة. وتقدر تتناول من القدسات التي للقديسن فقط.
يسوع : بس أنت قلت في الوعظة أن المحبة هي أعظم شيء لأنها الله وأعظم الوصايا أحبب الله والقريب كنفسك
الكاهن : وفر وعظتك … أسمع انت لو متعمدتش حسب نظام كنيستنا تبقى حكمت على نفسك بالهلاك ملكش نصيب من الخبز
يسوع : صدقني أنا معمد ونلت الروح القدس ومت وقمت وانتصرت على الخطيئة وحياتي مع الله الاب
الكاهن : انتصرت على الخطيئة !!
يسوع : أنا مش عارف ليه تمنع الخاطي من تناول الجسد ما الجسد ده كان وما زال وهيبقى للخاطيين اللي بيدوروا على توبة
الكاهن : هذه المايدة مش للخاطيين دية للقديسين
يسوع : إزاي مش قلت في القداس جسد ودم يسوع يعطى لغفران الخطايا يبقى لازم تديه لكل الناس فالجميع زاغوا وفسدوا وأعوزهم مجد الله
الكاهن : هذه القدسات للقديسين. للقديسين اللي من شعب كنيستنا فقط!!! انت مش بتسمع؟؟؟
يسوع : يعني الطابور كله قديسين بلا خطيئة ( ويلتفت إلى الوراء ويقول بصوت آمر ذي سلطان ) من منكم بلا خطيئة فليقترب أولاً ؟
( كل الطابور ينسحب واحد تلو الآخر منحني الرأس)
يسوع : وأنت أيها الكاهن إن كنت بلا خطيئة تناول من الجسد
( الكاهن في ذهول من سلطة المتكلم فيحني رأسه في خجل)
الكاهن : ولكن هذا ما أمرني به الرؤساء
يسوع : ينبغي أن يطاع الله أكثر من الناس
الكاهن : قصدك أيه
يسوع : الخبز ده واحد اتكسر علشان يجمعكم مش علشان يفرقكم
الكاهن : أنت مين ؟
يسوع : أنا هو يسوع الناصري الذي تبحثون عنه
( الكاهن يشير بغمز للشمامسة ليقبضوا على يسوع)
يسوع : (يسوع وهو خارج من الكنيسة) تقولون لو كنا في زمان آبائنا لما قتلنا الأنبياء
الكاهن : خذوه والقوه خارجا مع الخاطئين والخارجين وغيرهم من المنشقين
يسوع : أغفرلهم يا أبتاه لأنهم لا يعلمون ماذ يفعلون
الكاهن : يا أولاد ابراهيم، يا شعب المسيح لازم نحافظ على تعاليم الآباء ، كل من يتناول من جسد المسيح ويكون غير أرثوذكسي سوف يموت في الحال أو يجيلة فشل كلوي بشفاعة القديسين
الناس : جسد المسيح يموّت أزاي يا ابونا ده خبز الحياة
الكاهن : دي تعاليم الاباء واللي خالف ذنبه على جنبه
مشهد صامت
كل الكنيسة تتقدم منحنية الرأس في صمت
الأب متى شفيق
ايه الكلام الفاضي ده .. ده اسكتش كله غلط .. بدون زعل .. لأن الكتاب المقدس قال ” من يأخذ جسد الرب بدون استحقاق يكون مجرما في جسد الرب ودمه” .. التهاون في التناول خطية مش زي ما هو مكتوب “يجيله فشل كلوي” وكلام فاضي من ده .. يعني ينفع واحد يشرب الخمر وبعدها يروح الكنيسة يتناول .. واحد لسه سارق ويتناول .. واحد لسه زاني وفي خطيته ويتناول من جسد الرب ودمه؟!!! .. للتقدم للتناول من جسد الرب ودمه لابد من أن يكون الشخص نائب عن خطاياه اولا ومعترف بها أمام الله في محضر الكاهن .